An dengem Kierper stierwen all Dag 10 mol méi Zelle wéi et Mënschen op der Welt ginn!

D’Fuerscher beschäftege sech eréischt säit de 60er Jore mat der Liewenserwaardung vun eise Kierperzellen. 50-70 Milliarden Zelle stierwen näämlech all Dag an dengem Kierper a ginn ersat. Dat ass wéi wann d’ganz Weltbevëlkerung 10 mol den Dag giff ausstierwen!

Verschidden Zelle liewen nämlech geféierlech. Wéi zum Beispill d’Zellen an eisen Otemweeër, Mo oder Daarm. Déi si regelméisseg geféierlechen oder gëftege Substanzen ausgesat a mussen dofir aus Sécherheetsgrënn regelméisseg vun eisem Kierper ersat ginn. Grad esou Imunzellen, déi sech all béisen Ugrëffer stellen.

Dofir sinn déi Zelle genetesch virprogramméiert fir no kuerzer Zäit schonn ersat ze ginn an ze stierwen.

Fir aner Zellen ass méi eng laang Liewensdauer virgesinn, well se méi e gemittlecht Liewe féieren. Zum Beispill Nervenzellen! Mee och déi kenne virzäiteg “Selbstmord” man, falls se krank sinn oder iergendeppes net méi ronn leeft!

Op des Manéier ersetzt eise Kierper seng Zellen all 7 Joer eng Kéier.

Trotzdem gëtt ee méi al, dat ass nämlech just en Duerchschnëtt! Wäiss Bluttkierpercher zum Beispill ginn all puer Stonnen ersat, Hautzellen all puer Wochen a ganz spezialiséiert Gehirzelle just all puer Jorzéngten oder guer net.

Déi alteren also ganz normal. An och déi, déi regelméisseg ersat ginn, alteren! Well bei all Zelldeelung kenne Feeler a Problemer optauchen, déi zur Alterung bäidroen! Dat Ganzt ass also eng kleng Verjéngungskuer fir eise Kierper, mee trotzdem kee Wonnermëttel géint Falen!

Mister Science