Eigentlech muss ech soen, datt ech wierklech frou sinn dës Carte Blanchen dierfen ze maachen. Well dës gi mer ëmmer nees d’Méiglechkeet e bësschen Distanz zum Alldag ze huelen, an mech mat Saachen auserneen ze setzen, déi mech beschäftegen. Leider awer sinn et meeschtens Saachen, déi mech wuermen, sou wéi och dës Kéier, an zwar eppes wat ech d’Kultur vum Recht nennen. Mee wat mengen ech domadder?

Et geet lo net drëms, datt verschidde Leit een onméigleche Besoin hunn, ëmmer nees Recht ze hunn. Et geet och net ëm fanatesch Verdeedeger vun de Rechter vum Mënsch, Déieren, oder soss Liewewiesen.

Mee et geet mir ëm d’Tendenz, déi ech an der Läscht ëmmer nees méi oft begéine, wou Leit vun allen Zorte vu sech behaapten, datt si ee Recht op eppes Bestëmmtes hätten. Sief dat vu Leit déi sech sou on-elegant iwwert Frontalieren opreegen, déi hinnen hiert d’Recht op Aarbecht klauen, sief et déi wou sech opreegen, datt se net genuch Suen kréien, sief et déi wou sech opreegen, datt se keng Mobilitéitsbourse wäerte kréien an dat obwuel se jo awer Wëlles haten domadder een Auto ze kafen sou wéi di aner virdrun. Et j’en passe.

An do erkennen ech zwee Problemer. Engersäits verwiesselen vill Leit “Recht op” mat “Gerecht”. An anerersäits, hu verschidde Leit ee ganz falscht Verständnis vu wat et heescht, ee Recht op eppes ze hunn.

Wann den Noper sech ee neien Auto leescht, an ech ka mer deen net leeschten, obwuel ech méi haart schaffe wéi hien, ass dat vläit ongerecht, mee sécherlech net onrechtlech. Mee wa mäi Bouf méi spéit eng Bourse fir op d’Uni kréie géif, a mäi Meedchen kréich keng well et ebe justement ee Meedche wier, wier dat net nëmmen ongerecht, mee och géint d’Recht.

D’Kannerrechtskonventioun zum Bsp., wou et ëm Rechter geet, kämpft fir d’Rechter vum Kand a vum Jonken. Dat sinn elementar Rechter, an déi goufe gestemmt. Da gëtt et och nach eng ganz Rëtsch vu Mënscherechtserklärungen, dorënner déi bekanntesten: d’Déclaration universelle des droits de l’homme. Vun engem Recht op Liewen, bis hin zum Recht sech bestueden ze dierfen, iwwer d’Verbueden vun Sklaverei an Diskriminatioun, gëtt et vill interessant Aspekter déi d’Gesellschaft als ee Ganzt verbessere sollen. An deene Kontexter gëtt et och verschidde Verweiser op d’Recht op Educatioun oder Aarbecht, mee a kengem gëtt erwähnt dat et ee Recht gëtt op Studien op der beschter an deierster Uni, an och néierens gëtt et erwähnt, datt ee mat engem BAC+5 Recht op ee Salaire vun 5.000€ hätt.

Kloer, d’Liewen ass nun mol vläit heiensdo ongerecht, mee ganz oft, kéint een och einfach mol nëmmen acceptéieren, datt d’Liewen evoluéiert, oder schlemmstefalls decidéieren eppes u senger Situatioun ze änneren am Plaatz ze mengen et misst een alles um Plateau zerwéiert kréien?

Well wann ee vu Rechter schwätzt, schwätze vill Leit guer net gären vun hiren Obligatiounen. Rechter kritt een an enger Communautéit, mee an där Communautéit muss een sech bedeelegen.

Mee firwat zielen ech iech dat lo nees? Fir di Jonk? Sinn et wierklech di Jonk déi nees schlecht opfalen? Oder si mir et nees déi ee schlecht Beispill ginn? Ech weess et net. Mee wat ech viru kuerzem héieren hu vun engem Minister, ass dat all nei Generatioun am Prinzip verdäiwelt gëtt. Wéi wier et wa mer dat géife si loossen? An am Plaatz, weider an déi Jonk investéieren fir dat mer all an enger méi gerechter Sociétéit evoluéieren wou een net méi op seng Rechter poche muss. Dat wier mir Recht.

bisi