Firwat schmaacht alles esou komesch nodeems ech d’Zänn gewäsch hunn?       

Et ass esou erfrëschend, moies direkt d’Zänn ze wäschen. Bis een eppes ësst oder drénkt, dann ass et eriwwer mam Spaass. Firwat schmaacht alles esou komesch, just nodeems ech d’Zänn gewäsch hunn?

An der Zahnpasta ass eng Substanz dran déi mécht, dass et gutt schaimt. Déi huet e ganz barbareschen Numm, an zwar Sodiumlaurylsulfat! Op der enger Säit dréit de Schaum zu deem Gefill vun Erfrëschung a Propperheet bäi, mee op der aner Säit gehäit déi Substanz eise Geschmaachsënn total op d’Kopp.

Mr Science Za¦ênn Botzen

Wéi mécht se dat dann?

Mir hunn an eisem Mond verschidde Sensoren, déi déi 5 Geschmaachsriichtungen am Iessen detektéieren: séiss, sauer, salzeg, batter a fleescheg. An déi Substanz an der Zahnpasta setzt dee séisse Sensor ausser Gefecht an duerch eng chemesch Reaktioun stimuléiert en de battere Sensor an engem Stéck. Sou dass bei allem, wat mer iessen, de séisse Geschmaach ewech fält, an dee batteren iwwerdriwwe present ass!

Mee Orangëjus ass schlëmmer wéi alles anescht. Wéi ass dat da méiglech?

Iwwert deen Effekt sinn d’Fuerscher sech nach net ganz eens! Verschidde Studie weisen drop hinn, dass de Fluoride an der Zahnpasta mat der Saier vum Orangëjus reagéiert an dofir nach aner Geschmaacher optauchen. Aner Studie mengen, dass et un der Interaktioun tëscht dem Menthol an der Saier läit! Leider ginn et net ganz vill Fuerscher, déi am Gebitt „Orangëjus mat Zahnpasta„ spezialiséiert sinn.

Dofir en Opruff un iech all: probéiert et aus! Orangëjus testen an zwar kombinéiert mat Zahnpasta mat oder ouni Fluorid a mat Zahnpasta mat oder ouni Menthol! Haalt de Mr Science um Lafenden!

Fuerschung zu Lëtzebuerg

Also Zahnpasta geheit eise Geschmaachsënn fir eng kuerz Zäit op d’Kopp. Eise Geschmaachsënn kann awer och aus aner Grënn op der Kopp sinn, wat béis Konsequenzen op eis Gesondheet kann hunn.

D’Wëssenschaftlerin Gloria Aguayo aus dem CRP Santé huet den Impakt vun eisem Geschmaachsënn op eist Gewiicht ënnert d’Lupp geholl. D’Loscht op Séisses oder Salzeges soll a verschiddene Fäll psychesch bedéngt sinn an dësen désequilibréierte Geschmaachsënn bréngt eng désequilibréiert Ernärung mat sech, wat natierlech gesondheetlech Problemer ka mat sech bréngen.

Corinne Kroemmer